પૂર્વધારણા

પૂર્વધારણાની પંક્તિએ સરળતા લીધી,
અંતરધારાથી આરાધ્યએ ૠજુતા લીધી.

લાગણીના ખડીયામાં શાહી ટપકતી જોઈ,
ભીંજાયેલા કાગળોએ કેવી નાજુકતા લીધી.

સુખની સરવાણીઓમાં અંતઃસ્ફુરણા ફુટી,
ભીની મહેકના કણેકણે મુલાયમતા લીધી.

સમજણના સથવારામાં કંઈ રેખા સીધી,
છતાંય વળાંકે વળાંકે કોરી સહજતા લીધી.

અજવાળાની ઝાંખપમાં તેજ તિમિર લઈ,
મિજાજના મ્હોરાએ ક્યાં નિખાલસતા લીધી.

કાંતિ વાછાણી